Thursday, December 15, 2005

كل الشبه

مدنة و جرس
وصفوف حرس
ومدخنة تطلَع هباب
و بتاع كباب
و فرن عيش صاحبه شاويش
نفسه يعيش
فوق التراب
و ورشة خراطة
و انا ع البلاطة
عايش و ماسك فى الألاطة
وبتاع كازوزة
يشرب..ضميره يتسطل
و انا البطل
من غير بطولة مقنعة
لكن بطل
قلبى عطل
لمَا عشق بنت الجيران
و خيرها بان
فى بير السلِم
رفَعت هدومها
أنا عُمت عومها
عينى زَنِت
و اتزينِت
ضميت كنوز
زى العجوز
وفرحته لما يلاقى ف زحمته
طقم السنان
و شجرة عوجة
كان زرعها عم فاضى يوم الفالوجا
و سقاها من مطرة زهق
و دموع ملل
لما إتزنق ف البت نوجة
أهى دى حارتنا
عروسة لابسة المشنقة
لامَة الولاد و مفرقة
حزن الزمن بشبرقة

قلت العزال
ماعادش ليَه مكان هنا
وسط المُحال
وسكنت شارع م الكبار
وقلت هالقى العز فيه
بصيت عليه
وقت إعدام شمسنا ف المغربية
زى الصبية لو جوزوها بلطجى مهره الأذية
دققت نظرى ف المكان
شفت نفس المدخنة و نفس الهباب
ونفس مدنة ربنا و ريحة الكباب
شفت نفس الشاويش
لسة مش قادر يعيش فوق التراب
و نفس بياع الكازوزة
بيبيع نبيت
و بانى بيت
كاتب عليه
كل الأماكن واحدة يا خلق
لسة أنينها ماسابش الحلق
و لسة صوتها بيحاكموه
ويتهموه
علشان لقوه
فاتح ما بينه و بين حلوقنا خرق
لميت باقيتى من ع النواصى
و مشيت أجر ف دهشتى
و أدوس على طرف الطريق بجزمتى
صرخ الطريق من الوجع
إيه يا جدع
كده دُست على خدِى
ده انا البرىء
وساعات غريق
وياما عدًّى فيَّه الهم
و لسة بيعدِّى
وانا من سكات
بابكى على كل اللى هايموت فوقى
و على كل اللى مات
و بص لى بعيون مسافرة
وقال ف لحظة حب كافرة
إوعاك تنخ
مهما مطرة حزننا
فوقنا ترُخ
إقتل الهم بسيف الدم
بس إوعى يابنى ف يوم
قلبك تطُخ
و فاتنى و مَشَى
و ساب لى ورقة مكرمشة
مكتوب عليها
كل الشبه ساكن قلوبنا
نفس القانون
نفس السجون
نفس البراءة و المُجون
حتى العيون
نعاسها عار
يجمعها زار
و تفترق مع ضرب النار
حكمة قالوها من 100 زمان
دنيا خليط زى الخشاف
شكرى نايم مع عفاف
و الحاج هايص
بايت بيحلم يزوره طيف
روبها الشفاف
ويقوم يصلِّى
و ختام صلاته
خمرة حاف
دنيا ناسها بتتكرر
و تتحور
و تتحمر فى زيت الخوف
حتى الحروف
كتبت بمُر الحبر
غصب عنِّى
كان نفسى أبدأ م الطروف




إسلام :واحد صاحبى ماشفتوش من سنين
و ماعرفش فين ..

5 comments:

change destiny said...

دور عليه
فتش في دفاترك القديمة
على كل صاحب داس على طريق غير اللي دست عليه

بعد الطوفان والجو شبورة said...

sa3at bykoun ekhtefa2 7add ma3nah nehayet doruh f 7ayatak .. yemken kan doruh ennuh ye2olli elklmeteen dol w yemshy

بعد الطوفان والجو شبورة said...

ahmad fawzy , wallahy ana ba7awel a2oul ahu.........

Solo said...

أنا لسه فاكر القصيدة على فكرة
بس دا مالوش دعوة بأنك انت كمان واحشنى يابنى

بعد الطوفان والجو شبورة said...

solo, tawafoq 3adaly 3assaby 3agib :)bakallemak 3la eltelephone la2ettak raddeet 3 elblog , keep n touch , ana 3aref ennak fakerha , ahy ayaaaaaam