Saturday, March 25, 2006

الحاصل


بأكد إنى ماملكش من الأحلام
سوى الحاصل
و عارف إنى مهما امشى
و تِطوَل سكتى
واصل
يجوز يغرق فى ليل ألمى
واعوز اشرب دموع ندمى
لكن دايماً
ما بين حلمى وبين المستحيل
فاصل
للرائع الراحل .. عصام عبد الله
الصورة ل .. حمدى رضا

21 comments:

Anonymous said...

هو عصام عبدالله له دواوين منشورة؟؟
ياريت لو ليه تقول لى لان شعره رائع

السهروردى said...

أنت فينك يا عم الشباب
من فترة كنت بتابع شعرك و شعر الأخرين اللى بتنشروه و صدقنى كلهم بيعدوا الفلكات معايا
:)

Sekhmet said...

انا اول مرة اسمع عن عصام عبد الله -نوع من انواع الجهل - ممكن تحكى عنه اكتر؟

kalam said...

فعلا انا برضه اول مره اسمع عنه
بس واضح انه عالى اوى
عندك حاجه تانيه له؟؟

change destiny said...

اليومين دول الحلم نفسه مستحيل . في حجات كتير بتتخنق و تموت منغير ما نحس أو ممكن نكون بنحس بس مبيبقاش فينا طاقة نحاول ندافع عن حياتها

Anonymous said...

يعنى أنا ممكن من خلال معلوماتى المتواضعة أقول باختصار عصام عبدالله يعنى فى قلب الليل و أظن دى كفاية أوى عشان تخليه الرائع عصام عبدالله
شكرا على الحالة دى.. كفاية إنك فكرتنى بيه مش أكتر
و الصورة حلوة جدا على فكرة

بعد الطوفان والجو شبورة said...

عبد الله النديم : للأسف مفيش عندى دواوين منشورة ل عصام عبد الله .. لكن بادور و انشاءالله هالاقى .. اللى عندى غناوى قديمة كتبها و غناها ناس صحابى .. و شوية قصاقيص من أشعاره .. لو لقيت جديد هاقوللك .. شرفت المدونة

السهروردى : أنا اهو يا معلم .. انا بانشر الأشعار اللى بتعجبنى .. و ساعات باهيس و باكتب حاجات شبه الشعر .. لكن انا مش شاعر و لا ليه فى الموضوع .. انا بس باستطعم
:)

شاطىء آخر : مممممممممم
.. ناس كتير ماتعرفوش و كلهم معذورين .. أنا نفسى عرفته بالصدفة ..
عصام عبد الله من بدو الفيوم .. شاعر مرعب .. بسيييييييييط لأبعد حد و بيكتب بكل اللهجات المحلية .. صعيدى فلاحى .. بدوى صحراوى .. عامية دارجة و ممكن فصحى .. لف مصر كلها ورا الغنا و الأشعار و كتب أغانى مهمة جداً منها
ل على الحجار .. كان إحساسى صحيح .. روحى فيكى تروح .. و تحفته العبقرية طبعاً فى قلب الليل ..
سحر المغنى و الطول و اللون و الحرية و لو بطلنا نحلم و ل إيمان البحر عرفتينى
و لأنغام وحدانية و أغانى كتير ل عمرو دياب و محمد فؤاد فى بدايتهم و لفرقة المصريين و أغانى كتير مهمة جداً مش حاضرانى دلوقت .. و مات شاب .. و ساب غنا يكفى سنين جاية .. لكن لأنه ماكانش غاوى ورنيش مات من غير ما ناس كتير تعرف و ماحدش كتير فاكره .. لكن ده مايلغيش إنه مرق بخفة و روعة تليق بعبقريته

كلام : هانزله حاجات تانية قريب .. مبسوط انه عجبك .. افضل زورنى


change destiny : معاكى حق كتير .. لكن برضه مش معاكى حق دايماً

أنا أكتر حد قرفان من عيشته .. و طاقته خلصانة و مفرهض.. لكن لسة فيها .. لو الحلم استحال يبقى الحياة مالهاش لازمة..نموت أحسن. مادام عايشين يبقى فيه ثمة إحتمال
هامخوض معركتها بقى على رأى جاهين

لو بطلنا نحلم نموت
مش عصام قال كده ؟؟

فنجان : معلوماتك عن عصام هايلة و نشكرك على الإفادة .. م بأيدك جداً عن فى قلب الليل اللى باعشقها ..
و مبسوط إن الصورة عجبتك
شكراً

hesterua said...

جميل انك عرفتنا بيه
انا كنت اعرف اسمه من الأغانى اللى اتقالت وكنت مصنفه هو وعلى سلامة و محمد الناصر من عينة الشعرا اللى بيحسوا بالناس والناس مبتحسش بيهم
بس كلامه اللى قريتو عندك وكلامك عنوا ادانى فكرة عن شخص رائع اتمنى اعرف عنه وعن انتاجه
اختيار موفق

Sekhmet said...

ممكن اعرف عنه اكتر منين؟؟

Unknown said...

بجد مش عارف اقولك ايه يابو عرفات
اضفت لصوري الكتير من عمق المعني، انا بجد ممتن لك بشده، وكلمات الشكر والأعجاب تعجز جنب اختياراتك اللي بتدهشني وتخليني اشوف صوري بشكل جديد مالأول وكأنك عدتها علي فلتر حساس جدايطلع منها اللي احيناً كتيره مكنتش شايفه فيها.
تحياتي ومحبتي دائماً.

allfollowsome said...

اول مرة اسمع عنه
بس كلامه جميل جدا

sonia said...

اقول ايه بس....شكرا ليك ..

shababik said...

الصورة هايلة

هوميروس said...

حلوة الصورة والشعر طبعا

change destiny said...

هو أنا لازم أجي أخبط عليك كل مرة عشان تصحى من النوم؟ رحت فين تاني؟

karakib said...

حلو الكلام
انتووك

غادة الكاميليا said...

فعلاً أنا أول مرة أعرف اسم عصام عبد الله على الرغم اني سمعت معظم الأغاني دي وفعلاً من الأغاني اللي بحسها
شكرا
يا ياسر

3arousa 7alawa said...

بس بمسي..

mando4ever said...

استمتعت _ بجد _ بالبلوج بتاعك يا استاذنا....

كن بخير :f

بعد الطوفان والجو شبورة said...

أعتذر لكل من مروا عن الغياب و عدم الرد لإنشغالى الشديد .. و أشكر كل من سأل عنى فى غيابى ..



هيستريا : إختيارتك جميلة .. متفق معاك و أشكرك على زيارتك يا جميل

شاطىء آخر : أولاً إزيك .. أتمناكى بخير

ثانياً .. مقدرش أقوللك غير إنك تعرفى عن عصام من أغانيه القليلة اللى كتبها و من حكاوى اللى عاشوا معاه لما ساعات يفتكروه

للأسف

حمدى رضا: أولاً منور يا فنان
ثانياً : أنا اللى مش عارف أقوللك إيه على الكلام الكبير ده اللى انا ماستاهلش ربعه

ثالثاً : أنا اللى محتاج أشكرك على هذا الإرث الفوتوغرافى الرائع اللى خليته تحت تصرفى

رابعاً : أسجل إنبهارى بالتفاصيل الصغيرة المدهشة اللى مالية كادراتك و الحساسية المفرطة فى انتقاء اللقطات و الزوايا و التكوينات .... انت مرعب

خامساً : اتمنى اشوفك على خير بعد رجوعك بالسلامة من سويسرا الأم .. بالتوفيق يا ابو حميد


طاهر : اشكرك و يا رب نكون عند حسن الظن

سونيا : ماتقوليش حاجة .. انا فاهم .. أى خدمة انتى تؤمرى
:)

أحمد فوزى : يااااااااااااه انت من أيام سمات .. ده كان زمان جداً .. عموماً انا جيت


شبابيك : فعلاً .. شكراً لزيارتك

هوميروس : فعلاً جداً .. اشكرك بالنيابه عن عصام و حمدى على رأيك
و بالأصالة عن نفسى على زيارتك

change destiny: انا هاقولك يا ستى .. بصراحة .. انا باعمل نايم علشان تيجى تصحينى .. و اتصبح بيكى علشان اليوم يبقى جميل ..
انا صحيت أهو .. لكن مقدرش أوعدك إنى أبطل أعمل نايم طول مانتى بتيجى تصحينى :)


آسف على التأخير .. اتشغلت حبة لكن رجعت .. واحشنى التواصل الرائع
..

كراكيب : شكراً .. و ياريت بلاش أنتوك و الكلام الغامض ده عشان فهمى على قدى أو فهمى عبد الحميد يا عم فوازير رمضان.. نورت


غادة الكاميليا: كويس أوى إنى أكون سبب صغير فى إن حد يعرف حد و الأجمل لو كان الحد ده رائع و جميل زى عصام عبد الله .. اشكرك على التواصل و الزيارة

عروسة : مساء بديع و مختلف .. ايه بقى انت فين يا جميل .. أفتقدك
:)

ماندو: أشكرك -بجد- على رأيك فى البلوج و اتمنى تفضل تزورنى .. نورت يا أستاذنا :)

Anonymous said...

احييكم لحبكم واحترامكم للكلمة الحلوة الممثلة فى كلام الشاعر عصام عبدالله اللى انا باعتبره مثلى الاعلى انا اسمى محمود رضوان شاعر غنائى كتبت اغنية اسمها بننجرح لمحمد منير وكتبت لفريق اسمه وسط البلد اغانى زى عم مينا وتسرق بيوت وخلاص مسافرة وان شاء الله انا بعمل مايشبه جمع سيرة عصام عبد الله وبتمنى انى انجز العمل دا ولو عايزين تتابعو نى انا عندى مدونة ممكن تلاقوها بسهوله اسمها
elsha3erradwan.maktobblog.com
ان شاء الله يطلع عمل كويس لان فى الاخر النيه خير وزى ما قلت انا تعبت على ما وصلت لاخوه واتفنا اننا نعمل حاجة عشان عصام وياريت محبيه كمان يساعدونا ودا تليفونى لو حد عايز يكلمنى مباشرة 0127449952