Monday, May 22, 2006

عن حب الحياة

إختلف الفقهاء حول التسمية .. هل هى تفريجة كما قال الفقيه ابن رشوان " الذى بداخله البحر" أم تدبيسة كما ورد فى أوراق ابن الزهيرى صاحب المدونة الشريرة ذات النصوص العسيرة " سوء تفاهم " .. لكن من دواعى السرور أن الفقيهين العالمين ببواطن الأمور ,, على إختلافهما الحاد إتفقا بشكل جاد على دعوتى للجدال والإجابة على ذات السؤال .. لذا قررت أن أستقطع من الوقت ما أمكن و أرد بالتى هى أحسن ........

بجد سؤال بسيط لكن مش سهل تجاوب عليه من غير ماتقلب دماغك و تشغل حواسك كلها و تفتح صندوق ذكرياتك وتطلع أجمل ما فيه و تتخيل كل اللى مستنيه م الدنيا و عايش علشانه .. قد ما اعرف هاحاول

القشعرة الباردة اللى بتسرى ف جسمى لحظة ما اسمع جملة مزيكا تمس إحساسى بدون سابق تمهيد

تحية الجمهور فى المسرح لما أقدم فن راضى عنه و الناس تصقف جامد و خصوصاً الناس اللى ما اعرفهمش

أول بوسة لشفايف بتحبها -خصوصاً لو جرس الباب مارنش و انتوا مع بعض -

لما اكون فى حالة وجد شديدة وصادق جداً و مصدق و عينيه يدمعوا من التأثر

لما أشيل بإيديا طفل لسة مولود حالاً أول مرة - خصوصاً لو باحب أمه وأبوه -

مفاجآت صحابى لما يرتبوها من ورايا و يحبكوها كويس لحد ما اصدق و ألاقى نفسى قدام حاجة كان نفسى فيها فجأة

يفط المحلات القديمة جداً و بقايا إعلانات الشوارع بتاعت زمان

لما ننسى و نتحول عيال من غير اتفاق و نلعب فى الشارع بورقة أو إزازة فاضية و احنا بنضحك م اللى بنعمله

ساعتين الفجر ع البحر فى الشتا لوحدنا خالص و انا نايم على رجلها و صوابعها بتلاعب شعرى

ريحة شعر أبويا الطيبة

لما اشترى هدوم جديدة حاببها و بيرفيوم كان نفسى فيه

لما اسافر الفجر لوحدى بلد جديدة

أول تجربة جنس مع واحدة باحبها

الصبح بدرى قبل الناس ماتصحى ف بلكونة عالية و انا منى للسما

ريحة المطر -ريحة الدنيا بعد المطر -

العلامات لما تتحط ف طريقى علشان أعرف إنى صح

لما انفذ فن زى ما بتخيل بالظبط

لما طفل يضحك ف وشى بدون سبب

الفكرة لما ابقى عارف وانا بافكر فيها انها جديدة لانج

ريحة البن المحمص و طعم الفسدق

سندوتشات الكبدة الإسكندرانى و السجق والبيرة الساقعة

أول سيجارة بعد الصيام

وانا باتفرج على فيلم باحبه و دماغى مشَعَّرة على خفيف

حضن لحد بتحبه و واحشك أوى

منظر الجليد - من غير برده -

الشارع لما يبقى بتاعى - انا ماشى فيه لوحدى مبسوط و باغنى بصوت عالى -

ريحة بشرة الأطفال - خصوصاً حديثى الولادة

أطلب من كل اللى قرا التدوينة القيام بنفس الشىء دون تخصيص " علشان مانساش حد "

11 comments:

Anonymous said...

kont fel karnak beleel, 3ard el soot we do2 ,ma3a es7abi.wel donya bard be 3'alasa, we soot same7a ayoob we 3abdalla 3'eeth medy gaw ro3b laken e7na bel3aks kona a5er tahyees men 3'er ay shorb wala 7aga,da7akna tool el wa2t men 3'eer ay sabab, yemken 3ashan el bard?
dah aktar yoom de7ekt feeh fe 7ayati, aktar yoom 7aseet eny kont sa7ya we 3aysha...
nooon

Ahmed Rashwan said...

ماشي يا عم ياسر
أنا موافق على حاجات كتير بس لازم تحدد يعني مينفعش تبقى السندوتشات من عند سعد الحرامي أو من عند الأسطورة مثلا !!ا
اليفط القديمة لمحلات وبقايا الإعلانات القديمة لما تكون قديمة بجد مش متجددة
والمحلات و المقاهي التي مازالت تعلق صور عبد الناصر
أكتر حاجة علقت معايا وناس كتير
نسيوها
العلامات Signs
ساعات بتاخدك من إيدك وتحطك على بدايات طرق كتيرة
محبتي

Anonymous said...

الله الله الله
قسم يا عم قسم

Solo said...

أهو أنا نسيت فرحتى بالمفاجآت اللى بيعملهالى حد من غير ما اتوقع

أصلهل فعلاً حاجة تطول العمر
:))
سلام يا صاحبى

Alexandra said...

في ناس ردت على التاج ده بأشياء حسستني بتوحدهم جدا, انت حسستني على العكس انه الفرح او حب الحياة عندك مرتبط بالناس وبالتفاصيل الي الأخرين طرف فيها

3arousa 7alawa said...

جميــــل يا ياسر

بعد الطوفان والجو شبورة said...

anonymous : ربنا يعيدها أيام .. بالمناسبة .. كل سنة و انتى طيبة .. عاملة إيه ..أتمنى أسمع أخبارك قريب


film 69 : يا صاحبى ماينفعش يرد ذكر حد زى سعد الحرامى اللى مابيغسلش إيديه قبل ما يعمل الساندوتشات ف موضوع زى ده .. و بعدين الأسطورة رغم إنه كان مش بطال لكن صعب أوى آكل فتة شاوسخة لمدة سنة قدام

أشاركك بشدة ف عشق المحال القديمة
و أقدس العلامات
أكيد

فنجان : مش قوى يعنى .. على قدى يعنى :)


سولو : أهو أنا نسيت 150 حاجة كان نفسى أقولها تطول العمر ...

سلام سلام يا صاحبىىىىىىىىىىىىىىى

الكسندرا : أجمل ما فيها العشق و المعشقة .. و شويتين الضحك و التريقة ..
متهيألى الحاجات دى مستحيل أعملها لوحدى


عروسة .. إنتى أجمل


change destiny : :))))))

identité sans essence said...

يا سلااااااااااااااااام

تجعلني احب الحياة اكثر

حالة طواريء said...

استشف انك انسان يملك حساسية عالية مشوبة بالكثير من الرومانسية
صاحب هذه الصفات يتعب عادة في حياته و ها انا اراك محبا لها
تحياتي

بعد الطوفان والجو شبورة said...

سلاف عباس : أن أكون أنا من يبث مثلك بعض أسباب حب الحياة فهذا أبعد مما أتمنى بكثير .. و مبعث فخرى و اندهاشى ....
أشكرك على كلمتك التى اسعدتنى و استوقفتنى

rat :
مش كدة برضه ؟؟
يبدو أننى أنثر نفسى مجزئة مع كل تدوينة أنشرها ..
كلامك مظبوط ..
أسباب خصومتى مع الحياة أتداولها كثيراً ..
لكننى لكل ما سبق من أسباب و غيرها
عشرات .. ما زلت أحب الحياة حين
تغدو جديرة بالعيش

Anonymous said...

dont let them slip away.....dont ya yasser

radwa