Sunday, April 15, 2007

كراكيب




كراكيب و حاجات
وكلام و سكات
وبلح أبريم و بلح أمهات
بنور مسحور .. عفريت بينطط أحلامنا
و حاجات سابقاها خطاوينا
و حاجات مبنية ف أوهامنا
بنوتة و واد
ملك و وزير
خايفين ع البنت من الهلفوت
و الدور هايفوت
و الواد مكشوش مليون كشة
الدور مغلوط
و القلب بحور مشتاق لشطوط
و مفيش عسكرى راح يترقى
مش مالية عنيك الكام طابية و التاج و الفيل
و عساكر تستنى إشارة من أى وزير
أما انت سئيل
بتراهن ليه ع البنت ف دور خسران
أمثالك بيموت و ف داهية
شالوا العيال
حطوا العيال
حتى الإجابة ع السؤال ماعدتش بتريح ولى
ناجى العلى
بقى صورة عندك ف الدولاب
حبة ورق جوة الكتاب
سعاد .. سمر .. صلاح .. فؤاد
ألبوم صور لناس كتير بتحبهم
جايز يكون الحلم طوِّل و انت نايم
و مفيش سعاد و لا فيه صلاح و لا فيه ملك و لا كش موت
العيشة جوة الرسم أظرف م البيوت

حبة كآبة ف قلب لون
حبة فرح حبة جنون
لو حد واحشك إرسمه
لو حد ضايقك.. إرسمه و كون جرىء
وبإيه يفيد
واحد جعان هارسم قصاده رغيف و فول
واقطع أيادى النصابين
و انصب كمين فى دخلة اللوحة شمال
و امضى ف الناحية اليمين
لكن كدة راح اتوه فى رسم الناس و هانسانى
ومين هايرسم غربتى فى الدنيا إلانى
مدد يا كل اللوح ياللى ناقصها اللون
قضبان و إيد متشعبطة و عيون لواد مجنون
اللوحة مش كاملة و انا مدَّعى ألوان
بارمينى جوة العيال و اصطادنى ف عنيهم
مين حبنى فيهم
و زود الملح ف عيونى
فلاح فصيح حاسس بغربة فى المدن
وانا قلبى راكب قطر أسرع م الظروف
خلاَّنى من كتر الحاجات ساعات باشوف
و ساعات باشوف
طابور عزا و جنازة من اول ما قالوا يا اكتئاب
إيييييييييييييييييييييييييييييييييييييييه
هل حد فاهم شىء و حاسس سكته
ولاَّ الغلط بيبان غلط لما بييجى الصح جنبه يفضحه
سيب مطرحه
و خد مكانك جوة برواز الضمير
زى النهار مايبان كبير الليل كبير
مارد و فارد سطوته على كل سهران أو شجى
و يبان ضعيف المرتجى ا و المرتجى
زييى تمام أى حد بحبه لازم باخسره
كفاياك صحاب
كفاياك شغب
تايه فى متاهات النتيجة مطنشة عنيك السبب
الحلم لسة كبير عليك
جلابية واسعة مرحرحة
نشيد و ملوى ف جوف هواك
النور نداك سمًّاك حسن
والشاطر اللى يغزل المشوار برجل بتتلوى
على قد مسرح دنيته
يا غربته
اللى يحس بالزمن غير الزمن
شوف كام تمن راح يدفعه علشان يعيش
و الشيش مابيعديش شعاع
و الحلم مرمى فى المشاع
رجلين تدوس لما فانوس روحك مقرب ينفجر

أنا ليه كده مكسوف و قلبى بيرتعش
تلاتين سنة أحلام فى عز نشوتها بتقع
شمس و قمر و خريف و صيف
وانا ضيف تقيل على كل شىء
حتى انتى مش فاهمانى يا ام القلب الاخضر
أيوة انتى .. أنا باقصدك
و باحلًَّك م الوعود الطيبة ليًَََّه
أكيد بتحتارى قوى هاتحبى مين فيَّه
هاتحبى فى اللى انكسر
و اللى انتصر
ولاِّ اللى جمَّع دنيته و راهن على قلبه و خسَر
انا صدقينى ورقة وقعت من حكاوى ألف ليلة
عيون بتضحك م الوجع و عيون بخيلة
مقاومة حامية و احتلال
صورة ملك صورة جمال
حبة كبار حبة عيال
صفا ‘انتباه .. خرزانة .. كشكول مريلة
وأب واقف ع الجدار ورا لوح إزاز
صحاب حوَش و صحاب لذاذ
مش قلتلك ألبوم صور
هاتحبى مين
و مفيش ولا قبطان شريف
والنور نزيف ماسك ف عتباتك درَك

كشكول سطوره ضيقة
ف كل صدر بتترمى صورة لحبل المشنقة
فبدأت أخاف م الحلم حتى لما يكون سعيد
نفس السما بتصب ع الأرض الحاجات
نفس الكلام نفس السكات
نفس النظام نفس الهمَج
مثِّل و ف الدور اندمج
وصدق الصقف الكتير


من قصيدة كراكيب ل .. حسن زكى

Saturday, April 07, 2007

فقط ...... خواء



و لا شىء آخر !!



اللوحة من أعمال .. دالى