Thursday, December 29, 2005

وإنت إزيك

واحد مرة
قاللى إزيك
!جاتلى زغُطَّة
شىء جوايا فلفص منى
وراح متدشدش
ستين حتة
لميت روحى
وقلت أهوه
و انت إزيك
قاللى :أهوه
حسيت قلبى بجد جريح
حسيت انى ورقة ف ريح
طفى سيجارة
حسيت رغبة شديدة...شديدة
ف إنى أدَّارى
و فات أتوبيس
إتشعلق صاحبى
قلت أتسلَّى بالماشيين
بصيت جوة عيون و عيون
وعيون تانيين
قاللى غيابهم
إن عذابى نفس عذابهم
و إن كتير ع النار كابشين
.............
..قلت أهوه

كوثر مصطفى

الصورة ل حمدى رضا

11 comments:

HERA said...

حلو اوى اوى الاحساس ده
انا مش عارف الكلام وللا الصورة بس لمسنى اوى
-----------
حمدى رضا ده عبقرى

بعد الطوفان والجو شبورة said...

hera: شكراً جداً على رأيك ده .. مبسوط أوى إن البوست عجبك .. و أتمنى إنك تزورينى باستمرار .. حمدى رضا فنان حساس و جميل و إنسان تحفة .. هاوصلَّه رأيك

Anonymous said...

كلام جميل حست بكل حرف فية

تسلم ومشكوووووور على المشاركة

وفقنا الله لما فية الخير

مع خالص تحياتى

www.AFKaaaR77.blogspot.com

Nour said...

كوثر مصطفى دي من الناس اللي ملهمش حل أصلا

change destiny said...

جمالها في بساطتها مست روحي مش عارفة ازاي

yara said...

الصورة عجبتنى ... هوة ده مولد يمكن ... والا دى ناس واقفة بتصلى ... والا دى ناس فاقو واتظاهروا

hesterua said...

صورة جميلة
كوثر روعة
اسم البلوج ...ممكن يخلينى ادمع
كلامك جميل
فرحان انى جيت هنا

3arousa 7alawa said...

انت وكوثر وحمدي رضا؟ مره واحده؟ وجبة دسمة جداً... كوثر تبدع دائماً وتلمسني بعنف في "شدي الضفاير" حتى أكاد أبكي

بعد الطوفان والجو شبورة said...

Tamer:أشكرك ..تحياتى

Nour: أؤيدك جداً ..كوثر شاعرة ماحصلتش .. و تملك مخزون وجدانى مذهل .. باعشقها

change destiny: أشكرك على رأيك .. و كفاية إنها مست روحك ..إزاى ؟ مش مهم

yara : الصورة من مولد ..لناس فى حلقة ذكر..

hesterua:شكراً على رأيك جداً .. وفرحان أكتر منك إنك هنا .. نورت البلوج يا أحمد

3arousa 7alawa: الوجبة الدسمة هى كوثر و حمدى رضا .. أنا ماعملتش حاجة .. فعلاً شدى الضفاير مرعبة .. الغنوة دى بالنسبة لى هى الأنثى بكل تفاصيلها.. مبسوط بزيارتك ونورتينى ..

Anonymous said...

hehe, kawthar mostafa di dma3'ha 3alya awi

أكرم يعقوب said...

اللام عليكم

بجد احييك و بدة و بقوة و من نخاشيش
أعماق قلبى الداخلية العميقة على المدونة الجامدة مووووز دى

بس سؤال أنا لو عاوز اقرا حاجات للمعدية كوثر مصطفى ممكن الاقيها فين


أكرم العوضى