Thursday, June 01, 2006

إلحقينى

إلحقينى
أم تانية بتنادينى
و ف عينيها سيل حنان
غطى أشواقى و حنينى
إلحقينى
بتشاورلى من بعيد
أم راضيانى وليد
يا عنيدة..!!1
نفسى أونِّسنى بعينيكى
أيوة ها يكفُّم أكيد
لو تهامسينى بخيالك
يا جمالك لو تجينى
أو توافقى يا حبيبتى
ترسمى حلمك ف عينى
إلحقينى
من سنين عشرين يزيدوا
بينادونى أمهات
بس رافض أتركك
و انتى رافضانى أبات
جوة فكرة تقرًّبك
م الهوى و الأمنيات
يا ام قلب حزين هايبكى
من فراقى ..من انينى
إمتى هاتحطى إيديكى
فوق إيديا و تحضنينى
إلحقينى
خايف اندم إنى أفوتك
بين ضيوفك الكُتار
هجرتى مش قد صبرك
رغم حكمك بالفرار
ليه طلقتى العقل بينَّا
و انتى مشتاقة لجنونى
ليه بتتوضى ب زمزم
من صلاتك تحرمينى
ده انا ركعة ب ألف جنَّة
بس تنوى تركعينى
إلحقينى
إسلام حامد
سلامٌ عليك أينما كنت

15 comments:

M. El-Hajj said...

سلام عليه و علي من نقل عنه و علي من سمعه الي يوم الدين يا شيخ ياسر

السهروردى said...

أوعى تقولى ان إسلام هو اللى كاتب كل الشبه !!!
جميلة القصيدة

yara said...

سمعتها منك مرة زمان بس ماكنتش اعرف انه مش انت اللى كاتبها، كنت حاسسها اوى كعادتك
حلوة اوى ياياسر

hesterua said...

الله الله الله
بجد روعة..حسيتها قوى قوى
تسلم ويسلم

identité sans essence said...

كالعادة
يفيض احساسك
يفيض يفيض
...

بعد الطوفان والجو شبورة said...

زنجى :
و عليك السلام .. يا شيخ زنجى يااااااا جن


السهروردى: تخمينك ف محله هو يا معلم


يارا : لأ مش انا اللى كاتبها ..
عارفة ... أنا لما حاجة تعجبنى و تلمسنى باحسها بتاعتى .. علشان مصدقها بس .. و بعدين انتى قلبك اسود أوى .. لسة فاكرة ؟؟!!1

هيستريا : الله عليك انت .. تسلم


سلاف عباس : مش عارف أرد عليكى خالص و سخيف إنى أشكرك
مبسوط أوى

Anonymous said...

lessa da7'la as2alak enta islam walla nasherha le 7add....
3omooman ana 2addeit el nahar today checking el archives beta3tak,
wel 7a2ee2a 3agabny awi gaww el blog beta3ak,
we 7atab3o ;)

kalam said...

جميله جدا جدا

change destiny said...

صدمة بالنسبة لي اني ألاقي اسم غير اسمك تحتها

لأنها منك قوي

Sekhmet said...

ليه طلقتى العقل بينَّا
و انتى مشتاقة لجنونى
حلوة اوى
و عموما سعات مينفعش اننا نقول على الحاجه انها حلوة او جميله لان الكلام سعات بيفقد معناه
بس لا املك غير انى اقول
حلو

حدوته مصرية said...

احساس جميل
شكرا على البوست

Unknown said...

قصيدة حلوة
احساس رائع
شعر يعنى
من جوة نخاشيش
القلب
زورنى
ما احنا ف الهم سوا

بعد الطوفان والجو شبورة said...

daisy : أشكرك على رأيك و يشرفنى متابعتك و زيارتك لمدونتى
أكرر الشكر

kalam : شكراً جداً جداً


change destiny : القصيدة دى كانت صدمة لي انا .. إن حد يقوللى ع اللى نفسى اقوله .. هى منى برضه .. لكن اللى كتبهالى أشعر بكتير
تسعدنى تعليقاتك دوماً

الشاطىء الآخر : مبسوط إنها تلمسك زيي .. و أشكرك على رأيك .. إنتى أحلى

m.yasser : و شكراً على الزيارة


أبو أمل : أزورك طبعاً .. مدونتك تستحق زيارات لما تحويه من كنوز .. و ربنا يحفظلك أملك يا أبو أمل :)

روز said...

ممكن فعلا ان ( رائع ) أو ( حلوة أوي ) تكون سخيفة أو تقلل من روعة العمل , لكنى لا أملك غيرها !
***
بجد , هى رائعة , و حلوة أوي , و فعلا حسيت انها شبهى
(*نفسى أونِّسنى بعينيكى *)
جميلة جدا
**
تحياتى .. !!

Anonymous said...

إسلام حامد
قرأت له ديوان واحد
و كان رائعاً
يا ترى هو فين دلوقتي؟