Saturday, September 16, 2006

فرش متاع





كان الأمر أشبه بالتخلص من منغصات العيش و تبادل الأطروحات و تواصل محدود عبر وسيط يمكن استخدامه فى أغراض محددة .. كتجربة شيقة إذن بدا لى ذلك الشأن الإليكترونى الغامض -" التدوين"- فى بدايته .. بمرور الوقت ذاب ذلك الغموض حتى تلاشى تقريباً ليصير متعة أختلسها بين الحين و الآخر .. لأزيح عن روحى بعض أثقالها .. لم تراودنى فكرة الحصول على جائزة المدون المثالى أو جائزة الدولة التقديرية فى التدوين بالعربية .. و لا أصنف نفسى كمدون أساساً .. فالتدوين عمالقته و أنا فعلاً على هامش التدوين ..فقط أكتب ما يدور برأسى من أفكار و تداعيات دون إعداد مسبق أو حتى مراجعة .. دائماً كتابة أولى ووحيدة أنشرها أولاً ثم أكتشف ما بها من أخطاء فيما بعد .. ربما ذلك الفضاء الشخصى -كما أراه - هو ما كان ينقصنى ..كتبت فى شئون خاصة أحياناً .. لم أفترض هذه المساحة للشأن العام و إن كان فهو من زاويتى الخاصة و كما يبدو لى .. شيئاً فشيئاً بدأت فى التعرف على ملامح ذلك الكوكب الإفتراضى بكائناته و قوانينه الخاصة .. أتلمس بحذر كل ما يقع عليه بصرى .. أقرأ لآخرين و أعلق أو ألتزم الصمت .. أتفاعل بشدة أقبل و أرفض و أعارض و أنتقد أحياناً و لكن دون تعمد لفت انتباه .. حاولت أن أحافظ على مسافة فاصلة تسمح لى برؤية أوسع نسبياً دون تورط .. قاومت شغفى بمعرفة البعض و هوسى بالتفاصيل الإنسانية المختبئة بين طيات تلك الأروقة و الدهاليز الأليكترونية لتظل الصورة المتخيلة الإفتراضية كما هى .. أعرف أن الواقع أكثر سطحية و هشاشة لكننى لم أتصور أن يحمل بكل سخافته كل هذه المفارقات و التناقضات المريعة .. أن يتقيأ المرء ذاتاً افتراضية لا تمت لذاته بصلة مستتراً خلف اسم مفترض ليطرح شخصاً بديلاً لم يجرؤ أن يكنه يوماً .. كم من صفحات تكتظ بالأكاذيب .. ينصب أحدهم إلهاً للحرية ليدون بكلتا يديه بينما أغلال قدميه تمتد إلىما وراء باب غرفته الموصد من الخارج.. بماذا يشعر حين تلامس رأسه الوسادة عندما يرقد فى فراشه وحيداً .. بماذا تفكر سيدة التدوين الإيروتيكى الأجوف كل ليلة بعد كتابة ثلاث تدوينات بعضها لا يحمل سوى كلمة واحدة خاوية و لا تشى بشىء سوى فراغ روحى و كبت جنسى لن تعالج آثاره 100 سنة ضوئية من الممارسة الجنسية الصحيحة.. ثم يتدافع إلى صفحتها من يعلق باْخلاص لا تنقصه الجدية " طب بيعلق على إيه ده و النبى " الأمر فعلاً مثير للشفقة و الاشمئزاز .. ثم يزداد الأمر سخافة إلى حد أن تصبح بعض المدونات التى تطرح فيها أفكار جديرة بالمناقشة الجادة مرتعاً لتعليقات سخيفة أو سباباً صريحاً لصاحب/ة المدونة دون داع أو حتى بداعِ..
إذن على كل من يبحث بجوع عن فتاة أو من تبحث عن فتى أن يصير مدوناً و أن يعلق بانتظام على كل مدونات و تدوينات الجنس الآخر(المستهدف)و سيحالفه التوفيق فى مسعاه الكريم فى غضون أيام
و ليصبح التدوين" محسسة" و كل اللى نفسه يدخل يعلق أو" يحسس" على اللى تعجبه و لتتفشى أمراض " الهياجونيا " و الهلع الجنسى فى أزقة البلوجز و لنتبنى جميعاً دعوة " تعالوا نتحرش ببعض" بجانب" كلنا ليلى وحفل المدونون الأفارقة التالت و مدونون ضد التقبيص" ..ما هو الممارسات بقت هية نفسها شبه اللى بنقاومها بالتظاهر
بجد مفيش حادثة بعينها ولا حد بعينه مقصود بالكلام ده بس كل واحد -بالليل ع المخدة- عارف نفسه .. و مش بازعم الطهارة و لا بادعى الفضيلة أنا مليان بلاوى سودة لكن الحكاية بقت بيض و الزلال سد الطريق لدرجة أصبح السكوت عنها نوع من أنواع التعريضضضضضضضضضضضضضض
و بجد حاولت أتجاهل الحديث عن هذه الترهات المستفزة علشان الحياة مش ناقصة صراعات و لا مشاكل و كفاية اللى احنا شاربينه و طافحينه .. و أخيراً .. ماحدش يزعل أنا بس اتفقعت ... أقول قولى هذا و أستغفر الله لى و لكم
الصور.. حمدى رضا

9 comments:

Bassma said...

بعلق من غير ما اكون خايفه من حساباتك اللي اظنها صحيحه نوعا .. و من غير ما اخاف اتحط جوه علبه ليها رقم بيصنفني و لا يميزني .. كل الموضوع ان فعلا فعلا التدوينه عجبتني و حبيت احييك

Anonymous said...

بعض الناس بيستخبى ورا الافتراضى

بعد الطوفان والجو شبورة said...

بسمة : لفت نظرى فى تعليقك


بعلق من غير ما اكون خايفه من حساباتك اللي اظنها صحيحه نوعا .. و من غير ما اخاف اتحط جوه علبه ليها
رقم بيصنفني و لا يميزني

عزيزتى بسمة : أنا ماليش اى حسابات و لا أجرؤ أن أحسب حسابات مسبقة عن أحد
أنا باحترم كل الناس الجديرة بالإحترام و لا أصنف الناس تبعاً لأى هوى ولا أرقام
انتى تعلقى براحتك جداً و تقولى اللى عاوزاه دون حرج .. أن آسف لو سببت بتدوينتى الأخيرة حساسية لدرجة الخوف من التعليق عليها
بالعكس أنا باسعد بالتعليقات .. أمال أنا فاتحها ليه ؟؟

أشكرك على رأيك و تسعدنى زيارتك فى أى لحظة ....

تحية حقيقية


العزيز
شريف نجيب
أولاً منور المدونة
ثانياً : اللى دفعنى أنا قلته .. ان الأمر تزايد سخفاً إلى حد مرعب .. و انا من مدة طويلة ملاحظ لكن الظاهرة باتت ملفتة و تتزايد على نحو عنيف .. أنا لست مضار و ماحدش ضايقنى شخصياً ..لكن مش معنى كدة إنى أسكت .. متفقين تقريباً فى الرأى حول انتشار الحكاية لدرجة مؤذية لأى حد شايف
بجملة القرف
ثالثاً : متفق معاك فى حكاية الخلط بين العام و الخاص و الحقيقة ده مرض مجتمعنا من زمان و ما حدث معك طبيعى جداً مع اغباء المستشرى كطاعون فى بلدنا السعيد

رابعاً : أكيد طبعاً فيه ناس محترمة بتعلق و دول الأغلبية لسة .. التانيين عارفين نفسهم يا شريف من غير ما نتكلم كل واحد عارف نفسه كويس جداً .. أنا ماقلتش ان كل اللى بيعلقوا مغرضين و لا أقدر أقول كدة طبعاً .. لسة الدنيا بخير برضه .. على رأيك "خلى العيال تنبسط" و تعيييييش

أخيراً : أشكرك على المراجعة العلمية السليمة .. أنا أصلى كنت ادبى :) القصد كان الزمن الذى تستغرقه تلك السنة الضوئية .. و ممكن تعدى بس انت سامحنى و عديهالى يا شيرى
:) بجد سعيد بزيارتك و تعليقك

نسرين : ما هو ده اللى مجننى !!1

أخيراً .. يا ريت محدش يفهم كلامى غلط و كل اللى نفسه يعلق يتفضل .. دى حاجة تسعدنى جداً
و اللى هايعلق مايخافش و الله مش هافهم غلط .. :) أنا باعلق و هاعلق مش هاتكسف ..

Anonymous said...

أن يتقيأ المرء ذاتاً افتراضية لا تمت لذاته بصلة مستتراً خلف اسم مفترض ليطرح شخصاً بديلاً لم يجرؤ أن يكنه يوماً .. كم من صفحات تكتظ بالأكاذيب .. ينصب أحدهم إلهاً للحرية ليدون بكلتا يديه بينما أغلال قدميه تمتد إلىما وراء باب غرفته الموصد من الخارج..

sa7 awi
bas eventually i can't help but sympathize with those who can't be what they show they r...

مراكب ورق said...

وتستغفر الله على اية يا حج ده انت المفروض تسبلهم الدين وتاخد ثواب كمان

hesterua said...

الله عليك
المشكلة اننا لم نتكلم فى الموضوع ده بنتوه
زى ما قلت كل واحد فينا جواه بلاوى
ما علينا

Ρών. said...

أول زيارة لي للمدونة ، المدونة دي = بني آدم ، و هنفضل ننتقد بعض و نتكلم على بعض لأن الريموت كنترول private موش زي المنتديات ، الأخ الأكبر فوق دماغك و المشرفين ماسكين الإنذارات و غشتراكك يتجمد لو ما لبستس الكرافاتة .. زي المدارس يعني !

...

نعدي في يوم تاني ...

و كل سنة و أنت طيب : )

.رون

change destiny said...

:) أنا جيت

أنا باحترم كل الناس الجديرة بالإحترام" يا سلام

انت بجد مش شايف التناقض اللي في الجملة

من حقك تحب و تكره و تحتقر و تخترم لأنك بني آدم

من حق أي بني آدم عامل مدونة انه يقول فيها اللي هو عايزه

من واجب أي واحد سايب مساحة للتعليقات انه يسمع رأي أي حد يقول رأيه بأي اسلوب

من حقك تدخل تفرأ أو لأ من حقك تعجب بالكلام أو تتقرف منه

توتة توتة خلصت الحدوتة


يا ريت كلامي ميكنش ضايقك لأني مش بفكر في حاجة أو حد معين أنا مجرد بستخدم المنطق و أنا نايمة و بكتب

Anonymous said...

yaser 3agabny kalamk, yemken la2enno bye7ky 7aga ben7essaha bs mesh ben2ol!! zay ay 3alm ifterady koll elnas asamy welkhayal fannan yersem 3ala keefo folan wfolan!!

aktar 7aga 3agbany le7ad el2an heya gomletak .. mal3oon taree2 makhtartoosh...
khallina nshofak ya sadee2 sadee2y.
salam.